MATOKEO ya uwekezaji mkubwa uliofanywa na Serikali katika miundombinu ya uhifadhi yameanza kuonekana dhahiri baada ya Wakala wa Taifa wa Hifadhi ya Chakula (NFRA) kutangaza kuongeza uwezo wake wa akiba kufikia tani milioni 1.2 ifikapo Juni mwaka huu.
Hatua hiyo inatajwa kuwa ni mwarobaini wa uhakika wa usalama wa chakula nchini, hususan katika kipindi hiki ambacho dunia inakabiliwa na mabadiliko makubwa ya tabianchi yanayotikisa sekta ya kilimo na mifumo ya uzalishaji.
Ofisa Mtendaji Mkuu wa NFRA, Dk. Andrew Komba, amebainisha kuwa mkakati huo unalenga kuhakikisha Tanzania inakuwa na ngao ya kutosha ya chakula ili kumlinda mwananchi dhidi ya majanga ya asili na kuyumba kwa masoko ya kimataifa.
Matokeo ya kuongezeka kwa uwezo huo kutoka tani 800,000 za sasa hadi tani milioni 1.2 yanachangiwa kwa kiasi kikubwa na ushirikishwaji wa sekta binafsi pamoja na ujenzi wa vihenge na maghala ya kisasa katika kanda mbalimbali nchini.
Katika kipindi hiki ambacho mabadiliko ya tabianchi yanasababisha ukame wa ghafla au mafuriko, matokeo ya kuwa na akiba kubwa ya mazao yanaleta uthabiti wa bei sokoni.
Akiba ya tani 550,000 zilizopo sasa, ikijumuisha mahindi na mpunga, inasaidia kudhibiti mfumuko wa bei za chakula na kumlinda mlaji mwenye kipato cha chini. Uwepo wa vihenge katika maeneo ya kimkakati kama Mpanda, Babati na Sumbawanga unahakikisha chakula kinapatikana kwa haraka pindi maafa yanapotokea katika eneo lolote la nchi.
Mbali na kulinda soko la ndani, Tanzania sasa inaanza kuona matokeo chanya ya biashara ya kimkakati kwa kuuza ziada ya chakula nje ya nchi. Hadi sasa, tani 68,000 zimeshauzwa katika nchi za Kenya, Malawi, Zambia na DRC, huku lengo likiwa ni kuuza tani 450,000 katika msimu wa 2025/26. Hatua hii inathibitisha kuwa nchi ina akiba ya kutosha inayoweza kuhudumia mahitaji ya ndani na bado ikabakiwa na ziada ya kuingizia taifa fedha za kigeni bila kuhatarisha usalama wa chakula.
Dk. Komba amesisitiza kuwa matokeo ya maelekezo ya Rais Samia Suluhu Hassan ni kuifanya NFRA kufikia uwezo wa kuhifadhi tani milioni tatu ifikapo mwaka 2030.
Lengo hilo likifikiwa, Tanzania itajiImarisha kama ghala kuu la chakula kwa ukanda mzima wa Kusini na Mashariki mwa Afrika. Ili kufanikisha matokeo hayo, wakulima wanahimizwa kuzingatia kanuni za kilimo bora ili kuzalisha mazao yenye ubora unaoweza kuhimili muda mrefu wa hifadhi na kukidhi vigezo vya ushindani katika masoko ya kimataifa.
Post a Comment