Madereva na wafanyakazi wa mabasi ya masafa marefu wameanza mgomo katika maeneo mbalimbali nchini leo, Septemba 29, 2026, wakipinga kile wanachoeleza kuwa ni mkusanyiko wa changamoto zinazotokana na utekelezaji wa sheria za usalama barabarani, ikiwemo faini na adhabu wanazoona kuwa ni kubwa.
Mgomo huo umeathiri huduma za usafiri katika vituo mbalimbali, ikiwemo Kituo cha Mabasi Magufuli jijini Dar es Salaam, Msamvu mkoani Morogoro na Nane Nane mkoani Dodoma, huku taarifa zikieleza kuwa baadhi ya safari zimesitishwa pia katika Mbeya, Mwanza, Mikumi, Arusha na Kilimanjaro.
Miongoni mwa sababu kubwa zinazotajwa na madereva hao ni mfumo wa pointi unaohusisha kupunguziwa pointi, kusimamishwa na hatimaye kupokonywa leseni za udereva. Wakati huo huo, madereva hao wanapinga faini wanazodai kutozwa kwa makosa mbalimbali ya barabarani, ambazo kwa baadhi ya makosa zinaweza kufikia Sh1 milioni.
Madereva hao pia wameeleza wasiwasi kuhusu mfumo huo wa pointi ambao, kwa mujibu wao, bado uko katika hatua ya majaribio. Wana hofu kuwa mfumo huo unaweza hatimaye kuingizwa rasmi katika sheria bila kufanyiwa marekebisho wanayoyataka, hali ambayo wanadai inaweza kuongeza athari za adhabu kwa madereva, ikiwemo kusimamishwa au kupokonywa leseni na hivyo kupoteza kipato.
Wameitaka mamlaka husika kufanya majadiliano na wawakilishi wao kuhusu changamoto hizo, wakisisitiza haja ya kupitia utekelezaji wa faini, adhabu za leseni na mfumo wa pointi. Wamesema wako tayari kushiriki katika vikao vya kutafuta suluhu na kusubiri maamuzi yatakayofikiwa kabla ya kurejea katika kutoa huduma za usafiri.
إرسال تعليق